相召來去阮厝七桃(完結篇)
這站有卡無閒，足久無召各位好朋友去阮厝七桃了，足歹勢。咱接嘛就擱向大家來紹介阮厝ㄟ菜園仔。
卡早，阮厝ㄟ南邊面，有一個足大ㄟ菜園仔，菜園仔內底，種甲什麼菜攏嘛有，但是因為時代ㄟ變遷，菜園仔ㄟ一部份地，乎政府徵收去做路，一部份自己砌厝，所以菜園仔沒去了。接嘛麥甲各位好朋友紹介ㄟ，只是回憶而已啦，嘛是麥講在彼個時代，阮庄腳做田所經過ㄟ生活情形。
阮厝菜園仔ㄟ菜，攏是阮ㄚ爸種ㄟ，後來ㄚ爸早早過身去，就換ㄚ哥ㄚ底種。阮ㄚ爸甲ㄚ哥ㄚ有夠會曉種菜，伊所種ㄟ菜，每一種攏大甲足大叢、大甲足水，所以阮一年透冬攏有真齊、各種無共ㄟ菜通好呷。
阮厝菜園仔所種ㄟ菜，約略會動安尼分：
1、瓜類：菜瓜、苦瓜、胡瓜、金瓜。
菜瓜，就是絲瓜，因為菜瓜是旋藤的，所以阮在菜園仔邊空地頂面，用竹子，搭一個又高又大的菜瓜棚ㄚ，乎菜瓜旋藤，菜瓜大條了後，會一條一條垂下來，阮就會動看到那一條熟了、會動割落來煮啦。由於菜瓜ㄟ生長期足長，所以阮嘛時常有新鮮ㄟ菜瓜通好吃。
菜瓜棚ㄚ除了會動乎菜瓜旋藤以外，又擱會動遮日，阮ㄟ菜瓜棚ㄚ邊，剛好是古井腳，有時天氣卡熱，阮ㄚ母攏嘛在菜瓜棚ㄚ腳洗衫、做工作，卡涼、真好勢。
苦瓜，一般來講，呷卡少，所以只有栽幾叢自己呷，如果那麥栽卡齊，就在田裏栽歸區，然後賣乎菜販仔(※阮ㄟ田嘛有種過歸區ㄟ苦瓜。)
種苦瓜足厚工，苦瓜生出來了後，要一條一條甲伊包起來，一方面卡未乎蜂仔叮到，如果那乎蜂仔叮到，歸條苦瓜就攏歹去了。另外一方面，甲伊包起來，卡沒曬到日頭，苦瓜會卡白霧，卡水，要賣嘛賣卡好價。
胡瓜，阮講是號作胡仔(瓠瓜)。胡仔甲金瓜卡少人三餐攏在呷，所以有時只有在菜園仔邊種幾叢，要呷就有。通常阮ㄚ母三不五時會煮一半擺金瓜粥，有時煮鹹ㄟ，有時煮甜ㄟ，自己種ㄟ金瓜鬆擱Q，攏嘛足好呷。
2、豆類：皇帝豆、花蓮豆(婉豆)、敏豆(四季豆)、紅公ㄚ豆(菜豆仔)。
這幾種豆仔，差不多攏是冬天才種的，嘛是攏要搭架乎伊旋藤。皇帝豆和花蓮豆(婉豆)比較卡會著蟲，那著蟲就沒生或者生了無好，所以足歹顧，但是卡好呷，價錢嘛卡貴。
敏豆(四季豆)甲紅公ㄚ豆(菜豆仔)嘛攏種一、二壠，自己要呷就有，有當時煮菜豆仔粥，哇！足讚ㄟ，歸內面大大小小，大家嘛攏呷甲嗄嗄叫。
3、葉菜類：空心菜、茼蒿、莧菜、菠菜、Q妹ㄚ(A菜)。
空心菜足好種，黑白種、黑白活，而且一年四季攏有，所以阮三餐差不多攏呷空心菜。
茼蒿甲菠菜是冬天才會動種，茼蒿接嘛攏是呷麵或是呷火鍋在參，阮卡早攏是煮歸碗公配飯底呷。
莧菜、菠菜、Q妹ㄚ(A菜)嘛是時常種。Q妹ㄚ(A菜)卡早阮叫做鵝仔菜，那是底飼鵝仔ㄟ，那知這嘛攏是人底呷，擱足貴ㄛ，正是天地顛倒反。
4、塊根類：菜頭(蘿蔔)，豆仔薯。
菜頭(蘿蔔)甲豆仔薯，嘛是阮主要ㄟ食物，一般攏是用來煮湯。尤其菜頭ㄟ用途足大咧，除了煮湯，阮攏擱會甲伊曬乾，變菜埔；有時用醃ㄟ，變碧菜。菜埔和碧菜配粥，足好呷ㄛ！菜埔炒菜埔蛋，嘛是足香ㄟ。
5、塊莖類：大頭菜、菜心。
自己種ㄟ大頭菜甲菜心攏足幼，久久呷一擺，有當時煮湯，有當時用炒ㄟ，有當時作涼拌，攏嘛好。庄腳人，有通呷就好，簡單顧三餐啦！
6、藤蔓類：蕃薯菜(地瓜葉)。
卡早蕃薯菜是底飼豬ㄟ呢？那知影接嘛攏是人在呷？真正是時代無相共。
7、其它：茄子、花菜(花耶菜)、高麗菜、大蒜、蔥仔。
茄子、花菜、高麗菜、大蒜、蔥仔等，卡有底呷，所以這幾項菜攏種卡齊。
這些菜ㄟ種法，其中茄子、花菜(花耶菜)、高麗菜、大頭菜、菜心、菜頭、Q妹ㄚ(A菜)等，是用種苗種ㄟ。菜瓜、苦瓜、胡仔、金瓜、皇帝豆、花蓮豆(婉豆)、敏豆(四季豆)、紅公ㄚ豆、空心菜、茼蒿、莧菜、菠菜等，是用種子種ㄟ。大蒜、蔥仔等，是用蒜頭、蔥頭種ㄟ。蕃薯菜是用蕃薯籐直接種ㄟ。
菜種落去了後，每工除了要固定澆水以外，嘛是要下肥，下肥有分幾種：
1、澆尿：一是澆阮自己ㄟ尿(卡早ㄟ人，房間攏放一個材做的大尿桶，等尿桶ㄟ尿滿了，阮就甲伊扛出去澆菜，真是天然ㄟ肥料，有機的ㄛ！不過用尿澆菜，要用水稀釋，那無，菜ㄟ鹹死，安呢就無彩工了。)，二是澆豬尿，豬圈ㄟ豬尿那滿，阮嘛是攏總甲伊扛去澆菜。
2、澆大肥：大肥是阮便所ㄟ糞便啦，澆大肥ㄟ菜，大了尚美，天然ㄟ尚好，是金ㄟ。
3、下化學肥料。
澆尿、澆大肥，一般攏是成長期底澆，收成期就無底澆這些大肥了，尤其葉菜類和塊根、塊莖類，大叢了後，更加無底澆這些大肥，無阮那敢呷？
還有，菜那著蟲，有當時嘛ㄟ噴淡薄ㄚ農藥，那無，有ㄟ未大，有ㄟ葉子乎蟲呷了了，就死去了。但是噴農藥，嘛是成長期才有底噴，成熟期就無底噴農藥了，若無，呷到，會中毒ㄋㄟ！
菜若大叢，一工攏要澆兩擺水。彼袸，早時天才光，阮ㄚ嬤就在敲阮房間ㄟ窗ㄚ門，叫阮起來擔水澆菜，有時愛睏，或者是冬天，活麥冷死，足畏起來，ㄚ嬤就站在窗ㄚ邊一直唸，到尾ㄚ，嘛是無法度，卡畏嘛是要起來做，水澆完才去讀冊，等下埔放學回來，愛擱澆一擺，有當時攏澆甲晚茫茫，擱活麥冷死。
田庄人就是這款命，那有法度？草地囝仔，一方面要讀冊，一方面要擱幫忙厝裏ㄟ人作工作，無像這袸ㄟ囝仔這呢好命，又擱未滿足，時代ㄚ，真正無相共了！
阮厝ㄟ菜園仔攏種足齊菜，阮三餐攏呷，自己嘛是呷未完，有當時，阮ㄚ母甲ㄚ姊，會擔一些菜，走 三公里 外，去兵仔市或新村賣，兵仔市或新村主要攏是「阿兵哥」，或是「外省仔」，伊攏講中國話，阮ㄚ母甲ㄚ姊無識字，未曉講中國話，但是為了麥賣菜，所以嘛學了一、二句簡單ㄟ中國話。
ㄚ母甲ㄚ姊那賣菜轉來，伊攏ㄟ互相講中國話，伊講中國話擱未標準，嘛攏自己講、自己笑，實在趣味。但是ㄚ母甲ㄚ姊為家庭生活底打拼，嘛足感動ㄟ，就是伊ㄟ打拼，阮才有機會讀冊。
現代人講卡早ㄟ人有底勞動，身體卡好，卡未厚病痛，有當時感覺無是安呢ㄋㄟ，雖然做田人卡勞動，但主要是呷食ㄟ問題啦！譬如講，這嘛大家注重底呷什麼養生餐，ㄚ養生餐ㄟ菜，無是攏阮厝菜園仔所種ㄟ菜，是阮庄腳人一年透冬、每三餐所呷ㄟ菜，這菜卡養生啦！是無是安呢？
總講一句，阮厝ㄟ菜園仔，提供阮歸內面，一年透冬三餐ㄟ飲食，在彼個年代，台灣經濟卡歹，尤其庄腳人擱卡窮呷，每餐有菜通好呷就未歹了。伊底自己ㄟ土地上打拼做工、飼活自己，並且養兒育女、傳宗接代，這就是伊ㄟ人生。
所以自古以來，做田人簡單ㄟ想法是：「日出而作，日入而息，帝力予我何有哉！」伊只要平平安安生活、只要安安穩穩過日子，就滿足了，大家有瞭解伊ㄟ心情無？
留言列表
